Góða kvöldið

Hamlet rúllar áfram, hægt og bítandi. Það er skrýtið að sitja allt í einu uppi með auka viku, finnst maður allt í einu hafa allan tímann í heimunum. Er því undarlega rólegur, en veit að það á ekki eftir að haldast þannig lengi.

En verð að viðurkenna að síðan úthlutun Leiklistarráðs kom þá hef ég verið verulega hugsi yfir leikhúsinu og framtíð minni þar.

Á maður yfir höfuð að nenna þessu?

Ef maður setur á svið sýningar ár eftir ár fyrir litla sem enga styrki, vinnur af einurð og alvöru og setur svo loks upp verk (fyrir styrk þá lítill væri) sem virtist ná til fólks, bæði hvað varðar aðsókn, umfjöllun og sérstaklega viðtökur þá hafði maður að vissu leyti búist við því að horft væri til slíks.

Nú ef það er ekki polísía að byggja upp heldur vinna bara svona útfrá því sem nefndarmönnum "finnst" á hverjum tíma þá verður maður vissulega að setjast niður og hugleiða hvort maður vilji vera undir slíkt settur. Ef fyrri verk eru ekki metin þá er engin tilgangur í því að vera að þræla þetta.

Auðvitað gæti maður bara snúið sér að því að setja upp söngleiki eða annað leiklistartengt sem byggt er á gróðaforsendu , en það var ekki þess vegna sem ég fór út í þetta.

Vissulega hef ég aðra möguleika hér úti í Þýsklandi, get unnið hér og látið Ísland vera, en það er alltaf einhver taug sem kallar mann heim, að tala um - og við sitt eigið samfélag.

Veit það ekki...

En leikhúsið er ekki það eina í heiminum sem skiptir máli, það er svo margt spennandi, skapandi, áhugavert og fræðandi hægt að gera. Kannski maður eigi bara að víkka sjóndeildarhringinn.

-----------

Hildarleikurinn í Reykvískum stjórnmálum að baki í bili og menn geta þá snúið sér að öðru, enda hefur það tíðkast á Íslandi að gleyma svonalöguðu. Við erum ekki fólk sem nennir að hanga í fortíðinni, nennum ekki að röfla til lengdar heldur öskra á fólk þegar það á við og snúa sér svo að öðru.

Get ekki sagt að ég sé alltaf sáttur við þetta en kannski er þetta ekki verri leið en einhver önnur.

Svo er auðvitað spurning hvort að þetta hafi einhver áhrif þegar að næstu kosningum kemur, eiginlega vonar maður að svo sé. Ef ekki frá þeim flokkum sem að málinu komu, þá frá fólkinu í borginni og landinu.

Bestu kv.

Þorleifur
Berlín

Góða kvöldið aftur

Það er ekki hægt að taka það af Þjóðverjunum, alltaf þegar maður telur að þeir hafi náð að toppa sig í samviskubitinu og þröngvandi uppfræðslunni þá dettur þeim eitthvað nýtt í hug.

Sem dæmi má nefna það að á hverju ári þá er saklausum börnum á 9. ári troðið inn í rútur og keyrt er með þau af stað. Næsta stopp er svo - versogú - næstu útrýmingarbúðir!

Börnunum er svo smalað, skelfinu lostnum, í gegum brennsluklefa, pyntingarherbergi, fjöldagrafir, gassturtur og fleiri hryllingsstaði og þau "uppfrædd". Lýst er í smáatriðum hvernig Þjóðverjar (ergo - þau sjálf) hafi misþyrmt og murkað, í fullkomnu tilgangsleysi, lífið úr milljónum og milljónum manna, kvenna og barna - eins og þeim!

Þetta er svo líklega ástæða þess að þegar hér einhver fer að ræða 3 ríkið þá umturnast heimamenn. Það tekur smá tíma að átta sig á því, en ástæðan er ekki umræðuefnið sem slíkt, heldur hitt að það kallar upp nístandi barnæskuminningar.

En sumsé, þessar aðfarir að sakleysi barnanna nægir þeim ekki og því skal haldið út á völlinn að nýju.

Það nýjasta er að yfirvöld hér í Berlín telja að börn viti ekki nóg um Helförina og þetta aðkallandi vandamál þurfi að laga. Það kom nefnilega út könnun sem sýndi að 1 af hverju 3 börnum vissi ekki hvað helförin er. (enda ættu börn að vera með það á hreinu, sem og nákvæma skilgreiningu á orðinu þjóðernishreinsun, virkni kjarnorkuvera og skilning á afstæðiskenningunni - hinni fyrstu)

En stjórnvöld hér eru ekki af baki dottinn.

Nú ætla þau að gefa út teiknimyndabækur þar sem hryllingur helfararinnar er settur fram undir tryggri forrystu "Tinna" fígúru. Nú skal infiltrera hugmyndaheiminn þeirra líka. Meiraðsegja barnabækurnar fá ekki að vera í friði!

Nú skal ekki segja að ekki sé gott að halda sögunni lifandi, að vara við mistökum fortíðarinnar og gera allt sem hægt er til þess að viðbjóður seinni heimstyrjaldarinnar endurtaki sig ekki. En grensan hlýtur að liggja einhversstaðar.

Það hlýtur að koma að því að barnungum Þjóðverjum sé það í sjálfvald sett hvort þeir ætli að burðast með kollektívt samviskubit undangenginna kynslóða.

En það mun ekki gerast meðan þýska ríkið veit börnunm betur hvað þeim er fyrir bestu...

Bestu kv.

Þorleifur
Berlín

Góða kvöldið

Þetta var alveg sérstaklega góður dagur. Hamlet heldur áfram að malla, erfitt verkefni sem tekur sífellt á sig nýjar og óvæntar myndir. Maður hugsar sig tvisvar um áður en maður leggur í meistarann aftur. Þarf að tékka að andlega hliðin sé í lagi, svona til þess að standast honum snúning.

Leikkona í hópnum veiktist og þurfti því að fresta forsýningunni sem átti að vera á laugardaginn og hentar það mér vel, enda hefur maður þá tíma til þess að fínpússa, stilla af, og horfa almennilega á heildarmyndina áður en maður hleypir þessu út í heiminn.

Hamlet á klukkutíma, leikinn af nemum og æfður á 4 vikum hefur reynt á allt sem ég kann og get í þessu fagi.

Og vonandi verð ég betri fyrir vikið.

-----------

ég fagnaði svo góðum degi með því að fara út í súpermarkað og kaupa mér ferskan lax, kartöflur og smjör, kom heim, setti matinn yfir, stillti tölvuna á gufuna og hengdi uppúr þvottavél meðan herlegheitin mölluðust.

Hversdagsleikinn er stundum frábær.

----------

Svo er Börkur vinur minn í heimsókn. Hann er hér að vinna að tónlistarmyndabandi sem hann skaut á Kúbu og situr nú sveittur við klippingu. Spurning hvort maður nái honum í svo sem eins og eitt Trivial á eftir.

----------

Loks. Í dag er að mér skilst Valentínusardagurinn. Ég hef ekki hugmynd hvaðan þessi siður kemur og hef aldrei veitt honum neinn sérstakan gaum, en finnst merkilegt að hér í Berlín er áhuginn fyrir þessum degi akkúrat núll.

Enda er þetta landið þar sem stjórnmálamenn kalla fyrirtæki eins og FL Group engisprettufaralda, þannig að kannski eiga BNA siðir ekki eins upp á pallborðið hér eins og heima.

-----------

Stýrivextirnir ekki að fara neitt. Já, það kostar íslenska neyslupunga þó nokkuð að halda uppi blessaðri krónunni.

En í raun verður að viðurkennast að það er þó nokkur vorkunn þeim seðlabankastjóra sem hækkar vextina upp í 13.75% án þess að það hafi nokkur sýnileg áhrif.

Bestu kv.

Þorleifur
Berlín

Góða kvöldið

Fór í apótek í kvöld og keypti mér vítamín.

Ekki nóg með það, ég keypti mér rándýr, sérsniðin, karlmannavítamín.

Þetta er lausnin við eftirfarandi:

Stressi
Svefnleysi
Vondu mataræði
kaffidrykkju og
Reykingum.

Og ég tók fyrsta skammtinn áðan og mér líður miklu miklu betur. Borðaði hvítborna pitzu með góðri samvisku, drekk nú kaffi og reyki og finn ekki fyrir því!

Þetta er svona svipað og raunveruleikasjónvarp. Þar sem hægt er að fá mikið, komast langt, án þess að gera, geta eða kunna nokkurn skapaðan hlut. Í raunveruleikasjónvarpinu er í raun bara með því að mæta.

Svona er nútíminn frábær. Engin fyrirhöfn. Ein pilla með öllu einu sinni á dag.

Nú er bara spurning. Á maður ekki að segja upp líkamsræktarkortinu?

Þorleifur

Góða kvöldið

Ég ætti ekki að vera að blogga, ég ætti að vera að sofa.

En skrýmslið í lífi mínu, Hamlet, heldur mér vakandi. Ég hef áður sagt að Shakespeare sé besti kennari sem nokkur leikhúsmaður, sem ákveður að taka meistarann alvarlega, getur kynnst.

En eins og oft er með góða kennara þá er hann strangur.

Ég er búinn að vera að ströggla við það að hrista upp í Hamlet, færa senur til, skipta út karakterum, færa til og "bæta" og niððurstaðan er oftar en ekki sú að ég þarf að snúa við og færa verkið aftur nær tilhögun höfundarins.

Þetta er náttúrulega í hæsta falli pirrandi, mann langar nú eftir allt saman að sýna gamla þrjótnum í tvo heimana.

Og ég sé hann fyrir mér sitja einhversstaðar (líklega í tilturulega heitu loftslagi) og hlægja að mér. Bölvaður fanturinn...

Þegar maður reyndar hugsar til baka þá voru nú samt ströngustu kennararnir yfirleitt þeir bestu, þeir sem kenndu manni mest og maður hlýddi mest á. Og þykir þegar uppi stendur vænst um.

----------

Borgarmálin:

Þetta er að verða svo átakanlegt að það tekur varla nokkru tali. Tveir menn í forrystu nýss meirihluta berjast við að klúðra sem mest þeir meiga.

Ætlar aldrei að linna?

Hversu oft er hægt að ljúga að almenningi, hversu oft er hægt að gera mistök með almannafél, hversu oft er hægt að stinga félaga sína í bakið? Hversu lengi eigum við að þurfa að þola svona amatörisma?

púff...

Þá er það að baki. Mæli með langri ferð til Kúbu - fyrir tvo. Spurning hvort sólin og hið félagslega umhverfi þar komi ekki vitinu fyrir þessa menn. Og á meðan sé hægt að stjórna Reykjavík.

Bestu kv.

Þorleifur
Berlín

Góða kvöldið

Vinkona mín sagði eftirfarandi setningu í gær, en liggur ekki fyrir hvort hún var að tala um mig, eða sjálfan sig.

Setningin hljóðar svo:

Þegar fólk byrjar að hlusta á mig, þá hættir fólk að misskilja mig.

Það er ekki hægt annað en að taka undir þessi orð enda í tíma töluð.

Ég er að setja upp Hamlet og það er í dag vika í frumsýningu.

Þorleifur

Góða kvöldið

Hvað er með Ísland og bankarán?

Það væri alveg skoðandi að setja upp sérstaka rannsóknarstofnun til þess að skoða menn sem dettur í hug að fremja bankarán á Íslandi.

Og meiri bavíana en þessa frá því í morgun er vart að hugsa sér. Úr bankaráni, beint í andlitshreinsun. Þetta hlýtur að kallast að vera gripinn í bólinu. Sé fyrir mér svipinn á greyjið snyrtinum þegar löggann ruddist inn og greip kúnnan hennar glóðvolgann með agúrkuna í andlitinu.

Ég myndi gefa margt til þess að komast í pappírana þar sem þeir skipulögðu ránið.

Það sem hins vegar er fallegt við þetta að svona er efniviður í íslenska biómynd sem gæti slegið í gegn í útlöndum, svona svoldið sætt - eins og Björk. Álfur rænir banka.

Góðar stundir

Þorleifur
Berlín

Góða kvöldið

Mannanafnanefnd, já, ég veit ekki.

Það er eitthvað svoldið sætt við þessa nefnd. Það er eitthvað fallegt við það að nöfn þurfi að samræmast íslenskum hefðum. Kannski er þetta bara þar sem ég bý í útlöndum og hef svona létta nostalgíu fyrir hinu íslenska í fjarskanum.

En ég held reyndar að raunverulega ástæðan fyrir þessari nefnd sé til þess að vernda börn fyrir einhverjum hugdettuvitleysum foreldra. Þið vitið, þessi pínlegu nöfn sem maður heyrir hjá fólki þegar maður sér börnin þeirra í fyrsta skipti og maður brosir framan í nýbakaða foreldaranna og hrósar nafninu á sama tíma og mænan kólnar og maður biður guð að þetta nafn rými ekki við einhvern viðbjóð.

En eins og með svo margt í dag þá má aldrei koma frá hinu opinbera raunverulegar ástæður, því að þær gætu hljómað forræðislegar. Besta dæmið reykingabannið. Vinnuvernd my ass! EF svo væri þá væru þjónustulaus herbergi leyfð. Nei, þetta er forræði og ef það væri viðurkennt væri hægt að ræða það í alvörunni. Og þá komist að niðurstöðu sem allri eru sáttir við, en til þess þurfa allir að vera að tala um sama hlutinn.

Forræði er hluti af því að búa í samfélagi. Og grensan er síbreytilegt, en ekki er hægt að átta því á því, eða ræða hvar hún á að liggja þegar forræðisaðfarir ríkisins eru alltaf á flakki í dularbúningum.

Bestu kv.

Þorleifur
Berlín

Góða kvöldið

Þjóðverjar eru í National Socialisma ham þessa dagana enda eru 75 ár síðan Hitler og co. komst til valda.

Hér er varla hægt að kveikja á sjónvarpi, opna blað eða hlusta á útvarp án þess að heyra Þjóðverjana vera að velta þessu fyrir sér.

Það er ekki nokkur efi að stærsta spurning sem Þýskaland er kollektívt að kljást við er "hvernig stóð á því að við kusum þetta yfir okkur"?

Þetta er heillandi fyrirbrigði. Kynslóðir sem muna ekket eftir stríðinu eru engu að síður heltekin af þessu. Ekki má minnast á þetta á almannafæri nema hvíslandi undir 4 augu, í skólanum er þetta umræðuefni stöðugt upp á pallborðinu, þetta gegnsýrir í raun allt.

Auðvitað er þetta stór spurning. Hvernig vel menntaðri og upplýstri þjóð tókst að falla fyrir öðrum eins vitleysingi og Adolf Hitler. Maður þarf nú ekki að lesa lengi í Mein Kamp til þess að komast að því að maðurinn er annaðhvort snarruglaður eða takmarkalaust vitlaus, nema bæði sé.

Og menntasnobbararnir í borgarastéttinni skilja þetta bara ekki.

Ég hef notað tækifærið til þess að lesa upp fyrir Þjoðverja stuttaralega þýðingu mína á orðum Þórbergs Þórðarsonar sem skrifar í bréfi sínu um Hitler 1931 að annað eins samansafn af vitleysu, innihaldslegum útúrsnúningum og öfgabulli hafi hann aldrei augum litið. Og bætir því svo við að þessu geti ekki nokkur upplýstur maður fallið, fyrir nema í mjög skamman tíma í senn, og þá líklega fullur.

Þessu taka Þjóðverjarnir óstinnt upp, enda ekki vanir því að sitja undir mórölskum lexíum frá íbúum smáþjóða út í hafi, hvað þá rauðhærðum.

En eftir stendur að þeir kusu þetta yfir sig og geta ekki hætt að hugsa um það.

Og allir á bullandi móral.

Auðvitað er svo ris Nasistana efni í risa pistil, maður yrði að taka inn kreppuna miklu, versalasamninginn, niðurlæginguna í WW1 og hroka þýska keisaradæmisins, en þann pistil vil ég ekki skrifa í kvöld, og efast um að þið vilduð lesa hann.

En fyrir þá sem lesa þýsku var Spiegel að gefa út gott 100 síðna blað um þetta. Hér er svo fyrir enskumælandi.

Bestu kv,

Þorleifur

Góða kvöldið

Það segir marga söguna að hagkerfi sé nú nefnt eftir Britney Spears.

Þessi fárveika manneskja jók áhuga almennings á slúðurblöðum, þáttum og öðru tilheyrandi að í viðkomandi miðlum var mikil gósentíð.

Þessi misnotkun á eymd hennar er því miður sorgleg birtingarmynd á stöðuna í fjölmiðlaheiminum. Fjölmiðlar eru katastrófum háðir, enda eru það þær sem koma með björg í bú. Og eftir allt er það takmark fjölmiðla (sem og annara fyrirtækja) að græða peninga.

Auðvitað er ekki hægt að banna misnotkun á eymd manneskja, það eru fullt af stöðum í samfélaginu þar sem ólukka er nýtt til þess að græða peninga (þarf ekki að hugsa lengra en til vændis eða kláms) en það breytir því ekki að samfélagið þarf að staldra við, fjölmiðlarnir þurfi að staldra við þegar augljóst er að ásóknin í "fréttina" er farið að valda stórum hluta vanlýðaninnar.

Ég horfði á myndband þar sem Britney kemst ekki út úr búð vegna þess að hún er umlukt hundruðum myndatökumanna. Þeir húka yfir bílnum hennar, kalla á hana, ýta við henni, leyfa henni ekki að komast leiðar sinnar, hún er beinlýnis ofsótt.

Britney hefur vissulega náð langt með því að nýta sér aðgang að fjölmiðlum en það gefur þeim ekki rétt til þess að svifta hana grundvallar ferðafrelsi.

Og má því spyrja sig hver sé gerandi í svona tilfelli.

Eru það fjölmiðlarnir sem ekki gefa henni frið, eða erum það við sem klikkum á linkinn, kaupum blaðið og gefum fjölmiðlunum þannig ástæðu til þess að sækja svona á stelpugreyjið?

hvernig sem á það er litið er sorglegt að fall einnar manneskju sé skemmtun umheimsins.

Bestu kv.

Þorleifur
Berlín